الحاوي

توت حاوي حاوي توت
خش اتفرج هرج فوت
زاحم لاحم عارك اضرب
ناضل فاضل خطوه وتقرب
الحق نفسك
قبل مايلعب
وامسك نفسك
جوه الملعب
دانت ح تضحك لما تموت
توت حاوي حاوي توتِ
*********
توت حاوي سبع مرات
لعبه جديده ياحضرات
دق الفول ويالكرات
هات الشطه والبهارات
شخبط لخبط حضر طاسه وكب الزيت
ولع طلع ريحه مريحه ف جو البيت
ح تلقى عجينه عجيبه متينه
لاتقول تينه ولابروتينه
كل ياصنايعي
كل يافقير
كل ماهو لسّه الفول قناطير
آه ياسلام لو عود جرجير
تفضل تاكل لما تموت
توت حاوي
حاوي توت
**********
توت حاوي حاوي توت
خش اتفرج هرج فوت
قعده فكيهه
حتسمع فيها
حكاية البيضه والكتكوت
يحكى ان
ولازم يحكى
وكان ياما كان
قبل الجنه
كان فيه بيضه وفرخه كمان
دبحوا الفرخه طبت سارخه
قامت البيضه طقت شارخه
طقشت فقست فرخ فصيح
يدن يهلل ويصيح
حتى ان كان على وش دبيح
يفضل يدن لما يموت
توت حاوي
حاوي توت
**************
سحر مفيش دا كلام تهويش
نفض مخك يابو درويش
كل مافيها الدنيا دي فيها
ناس بتبكش
لجل تعيش
حابس حابس
عفريت كابس
ينزل قالع
يطلع لابس
واللي يرقص ع المسامير
واللي بإبره بيفتح بير
واللي بينفخ في المزامير
يفضل ينفخ لما يموت
توت حاوي توت