يا بهيه

يسبق كلامنا سلامنا
يطوف ع السامعين معنا
عصفور محندق يزقزق
كلام موزون و له معنى
عن ارض سمرا و قمرا
و ضفه و نهر و مراكب
و رفاق مسيره عسيره
و صوره حشد و مواكب
ف عيون صبيه بهيه
عليها الكلمة و المعنى

********

مصر يا امه يا بهيه
يام طرحه و جلابيه
الزمن شاب و انتي شابه
هو رايح و انتي جايه
جايه فوق الصعب ماشيه
فات عليكي ليل و ميه
و احتمالك هو هو
و ابتسامتك هي هي
تضحكي للصبح يصبح
بعد ليلة و مغربية
تطلع الشمس تلاقيكي
معجبانية و صبية يا بهية

*******

الليل جزاير جزاير
يمد البحر يفنيها
و الفجر شعلة ح تعلا
و عمر الموج ما يطويها
و الشط باين مداين
عليها الشمس طوافه
ايدك في ايدنا
ساعدنا
دي مهما الموجة تتعافى
بالعزم ساعه جماعة
و بالأنصاف نخطيها

********

مصر يا امه يا سفينة
مهما كان البحر عاتي
فلاحينيك ملاحينيك
يزعقوا للريح يواتي
اللي ع الدفة صنايعي
و اللي ع المجداف زناتي
و اللي فوق الصاري كاشف
كل ماضي و كل آتي
عقدتين و التالته تابتة
تركبي الموجة العفية
توصلي بر السلامة
معجبانية و صبية.. يا بهية

********

و يعود كلامنا في سلامنا
يطوف ع الصحبة حلواني
عصفور محني يغني
على الأفراح ومن تاني
يرمي الغناوي تقاوي
تبوس الأرض
تتحنى تفرح
و تطرح
و تسرح
و ترجع تاني تتغنى
اللي بنى مصر كان في الأصل حلواني

كتبها احمد فؤاد نجم عام 1968